حنا عوض ما نجمعو الفلوس باش نشريو الزرع، والزيت، كانفكرو أولا نخليو فلوس التدفأة... المدينة كلها كاتعاني من واحد البرد صعيب فالشتاء وما عندناش شي دعم ولا مساعدة، وخا عيينا ماندويو فهادشي.

هما الحيوط كاينين ولكن باش نقولو سبيطار راه ما كاينش... لي بغى يولد خاصو يمشي لخريبكة ! ولي مشا يولد فخريبكة خاصو يسجل ولدو تما ويبقى من بعد غادي جاي على أي ورقة إدارية احتاجها...

الصحة هنا فالحسيمة متدهورة إلى أدنى حد. عندنا مركز كبير ولكن لداخل ما كاينش أطباء في بزاف ديال الإختصاصات. أبسط حاجة هي المعاملة... ما كايناش !

حنا لي قرينا فالسبعينات، قرينا حسن من دبا.. والمشكلة الأخرى هي أنه الشباب لي خسرات عليهم الدولة باش يقراو، كايبانلهوم غير يمشيو برا !

المواطن منين كايمشي للسبيطار ديال الدولة، خاصو يتستقبل بكرامة، لأن راه بفلوس داك المواطن لي كايخلص الضرائب باش كايتخلصو الناس لي خدامين فيه. خاصو غير يدخل مع الباب يحس بالعناية والإنسانية لأن مادام جا تما إلا وا راه مضرور!

أصيلة مدينة فيها الثقافة والسياحة ولكن مابغيناش نبقاو نخدمو شهر واحد فالعام. وحتى السياحة، ماكايستافدش منها كلشي. خاصنا فاش نخدمو العام كامل.

لي ماشي موظف وعندو "سالير" مزيان كيطيح كل شهر، راه صعيب عليه يسكن فشي سكن لائق. حيت مثلا، مكاينش حتى السكن الاقتصادي هنا فبوعرفة.

كاين شي حوايج تدارو، عاطين جمالية للمدينة وعاطينها شهرة... ولكن فاش كتدخل وسط الأحياء الشعبية، حاجة أخرى... الناس مزالة كاتعاني من الواد الحار، الناس مزالة كاتعاني من الضو، الناس مزالة كاتعاني من الطرقان والبنيات التحتية!

مع الأسف، ما كاينش روض عمومي للجميع! يعني كايبقى أنه لي عندو الإمكانيات، راه ولدو كيستفد من الروض، ولي ماعندوش كايخلي ولدو حتال التحضيري، وديك الساعة ما كايكونش واجد، ولا كايكون فرق كبير بينو وبين هداك لي داز من التعليم الأولي!

دار الشباب لي عندنا هنا ولات بحال الأطلال! قليل فين كاين شي تنشيط! وعندنا فنانة لي يمكن يحييو داك المكان... ولكن عاوتاني هداك المنشط ما كانعطيوهش شي حاجة باش نحفزوه. كايخرسروا عليه غير "شهادة المشاركة"!