عادل الخيرفي، شيشاوة
أنا كالشاب غادي ندوي أولا على انعدام فرص الشغل حيت ما كاينش قطب صناعي ولا شي معامل كبار. المدينة مهمشة اقتصاديا ! الشباب لي كايقلب باش يخدم خاصو يمشي لمراكش ولا كازا ولا مدينة خرا… الوظائف لي هنا ماشي وظائف ولكن فرص عمل مؤقتة الأغلبية ديالها فالفلاحة. المنطقة كيفما كلشي كايعرف مشهورة بالبطيخ والدلاح يعني الخدمة موسمية فالفيرمات من شهر سبعة لشهر عشرة.
المدينة عندها موقع استراتيجي ولكن ما مستغلش ! جينا هنا وسط مجموعة من القبائل، كاين قبائل حمر، الدوكة، ولاد بن سبع، الشياضمة يعني يمكن للمدينة تكون قطب تجاري لي كايجمع بيناتهوم. كاتشوف دبا سيد المختار صغر من شيشاوة والرواج لي كاين تما ما كاينش هنا ! دبا المدينة غير معبر وصافي وما كانستافدوش حتى من الناس لي كايدوزو ! مراكش مدينة سياحية معروفة على الصعيد العالمي، وبزاف من داك السياح كايبغيو يمشيو للبحر وأقرب بحر ليهم هو الصويرة، وباش يمشيو للصويرة كايدوزو من شيشاوة. يعني الآلاف ديال السياح كايدوزو من هنا ! علاش مايكونش عندنا شي مركب كبير ديال الصناعة التقليدية ولي داز يتوقف فيه. المنطقة معروفة بالزرابي ولكن ما كاينش تسويق. كاين واحد المحل قديم ولكن ما جاش حتى على الطريق. خاص يجي على الطريق الرئيسية وباين ويكون موقف ديال السيارات كبير باش داك السائح كاتجيه ساهلة يشوفو و يوقف و يدخل. مشكل أخر ديالنا حنا الشباب هو أنه خاصك تمشي لمراكش باش تكمل قرايتك. علاش ماتكونش عندنا ملحقة جامعية. هنا كاين التكوين المهني ولكن ما موالمش للحاجيات ديال المنطقة. خاصنا شعب فالفلاحة بدرجة أولا. وكانتكلم على تكوين عالي ! حيت هنا كاين مشاريع كبيرة ديال الليمون والزيتون وكاتلقا اليد العاملة ديال المنطقة ولكن المراكز المهمة، التقنين الزراعيين، ولي كايسيرو من مدينة خرا، مثلا من بني ملال، مكناس… علاش ؟ حيت ولاد المنطقة ما عندهومش تكوين كافي باش يخدمو فداك المراكز.
صافي النتيجة هي البطالة لي كاتأدي للكريساج لي كا كايأدي لانعدام الأمن إلى آخره… !
نقطة أخرى هي الصحة. كاين مستشفى محمد السادس ولكن غير بناية بلا تجهيز بلا أطر ! ياك أدنى حاجة فالسبيطار هي الولادة ! وحنا غير كاتجي لمرأة تولد كايصيفطوها لمراكش. أنا كايجيني هداك ماشي مستشفى وإنما إدارة. كاتمشي كايعمرولك واحد الورقة باش تعطيها لسيارة الإسعاف وتمشي لمراكش. صافي ! الأطباء كي قلت تا هوما ما كاينينش. كاينين فالوراق شي وحدين محسوبين على شيشاوة ولكن كاتلقاهم أغلب الوقت خدامين فمصحات خاصة فمراكش. من الناحية التهيئة الشارع الرئيسي والواجهة مزيانين ولكن الأحياء الداخلية ناقصة. وخا هكاك الصراحة كان تحسن فالسنوات الأخيرة ولكن مزال كاين الخدمة.
تواجه مدينة شيشاوة صعوبات في تطوير نشاطها الاقتصادي على الرغم من موقعها في ملتقى الطرق الرابطة بين مراكش والصويرة وآسفي وأكادير. وأجمع على هذه الخلاصة نحو مائة من السكان التأم شملهم عبر تقنية التناظر بالفيديو التي وفرتها مبادرة 100 يوم 100 مدينة، في نهاية ماي 2020.
كما أجمعوا على أن المؤهلات السياحية والثروة الفلاحية التي تزخر بها المنطقة كفيلة باجتذاب المستثمرين إلى هذه المدينة التي يطيب فيها العيش. لكن الواقع غير ذلك، ففرص العمل قليلة والساكنة تنحدر في درجات الفقر. وأكد المشاركون أن على شيشاوة تشجيع إنشاء منطقة صناعية متخصصة في الصناعات الغذائية، وتثمين الصناعة التقليدية ودعم الثقافة لجذب الزوار على غرار التجربة الناجحة في مدينة سيد المختار المجاورة .
وأثيرت خلال الاجتماع مشكلة البنيات التحتية الحضرية، إذ وضع الأصبع على مكامن الخلل في شبكات المياه والصرف الصحي في كثير من أجزاء المدينة.
أما النواقص الأخرى في المدينة، فتهم قطاعي الصحة والتعليم. فمستشفى محمد السادس الإقليمي يبدو متجاوزا والمستوصفات غير قادرة على دعمه. وفي ظل نقص التجهيزات والأطر الطبية تزداد صعوبة تقديم العلاج، بما في ذلك الأكثر استعجالية كحالات لدغات العقارب والثعابين، حيث يتعين نقل المصاب إلى مراكش في غالب الأحيان.
وأخيرا، انتقد المشاركون التعليم العمومي بسبب نقص المدارس وما يستتبعه من اكتظاظ الأقسام واضطرار الأساتذة أحيانا إلى السكن في المدارس نتيجة غياب الإمكانيات المادية. أما الطلبة المعوزون والذين ليست لديهم منحة فيضطرون إلى مغادرة مقاعد الدرس بحكم غياب تعليم جامعي في شيشاوة.
